Sidooca baaxok katla axawah edde tanim qafara. Akah naaxigennah, amoxer qafar ummatta elle tangaleh tan dabqi” Sidoocaamo” deqsita. Sidoocaamo sidooca baaxot kitfen aqwah innah ittak kureeniih, baxseenih yanin qafar baaxoh karta. Itiyoppiyaay, Eritriyaa kee Jabuutî doolatih addat tan qafar baaxo ittat sidoocaamo. Sidoocaamo, Yalli gaanê ginô gaddak orbeyná abeh yan qafar baaxo. Dumaak ta baaxo, sidooca doolatittet akah kurrumtem, is leh tan ginô gaddih loowit kee koboru. Edde yantifiqoonuh, beedi xin kah kurak arac xagse hadafa.( Sidooca doolataay, qafar sidoocaamo exxa exxah kurrusitteh tanik maddur elle soolaah, katlah loonum woo sidoocaamok keefiten exxaaxi. Axicihiiy jabuutik maddur qekuh elle yanim bada kee qasbo…tama bad lem kaadu qafar ummattaay sidoocaamok jabuutit raaqiseeni. Eretriyah maddur/katla edde tanim qasabada. Qasa kaadu qafar xayloh ikoytaay qafar elle yaaxigeeni. Etriya qasa badaak kalah leh tan gaddi mayan. Qafar kak tûxiq maliiy mari gabat leeh, wakaay, marat limmoysan. Away itiyoppiya edde tantifiquh bical kah tan. Itiyoppiyat raqta exxa qafar sidoocaamok kaxxa gaddale baaxo. Maqaadin, weeqaytitte, qasbooy, baadak wacaysir kee sehda samadak raceenah tan. Itiyoppiyal katlah edde tanim qafar baaxo. Itta fan gacissa haah an waqdi ta doolatittek katlah tanim qafar kee qafar baaxo. Akah keefiteenim woh edde yaaxigen bagu. Ta gaddat duddaluk yantifiqoonuh, kobritoonuh qafar ummattat xamcin gaadu abak maqar cabsiisaanam hadafah loonuuh abak geytimaanam. Sidocuk mariiy isi gubat yabbixe exxak wakaay ikke gaafisak, ummattak ixxu daggoysak maqar nee cabsiisan. Exxak teynal tanim baaxo cabootuh guubuk diiriyen. Exxak teynak qarkayto bukkussa heenih milki cabsiisen. Exxak teyna kulli cuggaanet boodisak xakak kah kaliten. Ginô gadda inkih isinni guub fanah akak weeren. Kulli exxak tan qafar xeflih edde gaadaanaah, edde boolaasaanam kaadu qafar gaba. Jabuutil qafar qafar miroctih gabat gaadan, itiyoppiyal qafar ummattal xukko tabbixem ken addak tewqe qafar xaylo. Nek mano elle tanim tama weelo. Makkoh net aben kurtiiy, makkoh nek aban saaxaay, makkoh ni fanat ginan kookaxaw. Nummah ta doolititteey gubat kak nani neh akah xuwawtam maliiy, nanu keenik qamballa xuwaw kee dadal nek hoxa. Sinam nek abta gaadut koysinnuh ni fanat mannah yan angaarw yaniih innek nee gaada beedah lino naqabuk muxxi itta niqibnooh, itta sadna. ………… Tahak maca abnam tayseeh…..???Maca neh tayseeh…..iyyaanamal mabla yaceenim siinil caba